له کپتانۍ د رشيد خان لرې کېدل سخت غبرګونونه راوپارول؛ ابراهيم ځدراڼ د شل اوریزو لوبډلې نوی کپتان شو
کابل – د افغانستان کرېکټ بورډ په تازه پرېکړه کې د افغانستان د ملي لوبډلې نوموتی لوبغاړی رشيد خان د شل اوریزو (T20) لوبو له کپتانۍ لرې شوی او پر ځای یې ځوان توپ وهونکی ابراهيم ځدراڼ د لوبډلې نوی کپتان ټاکل شوی دی.
د کرېکټ بورډ د دې پرېکړې له اعلان وروسته د کرېکټ په حلقو کې پراخ غبرګونونه راپارېدلي دي. يو شمېر د کرېکټ
کارپوهان وايي چې د رشيد خان له کپتانۍ لرې کول سمه پرېکړه نه ده، ځکه نوموړي په تېرو کلونو کې د افغانستان د ملي لوبډلې لپاره مهم رول لوبولی او د هغه مشري د لوبډلې لپاره ګټوره بلل کېده.
کارپوهان زياتوي چې رشيد خان نه يوازې د افغانستان، بلکې د نړۍ له غوره شل اوریزو لوبغاړو څخه شمېرل کېږي او د هغه تجربه د لوبډلې لپاره ډېره ارزښتناکه ده.
بل لور ته د کرېکټ زيات شمېر مينوال هم د دې پرېکړې پر وړاندې غبرګون ښيي. دوی په ټولنيزو رسنيو کې پر افغانستان کرېکټ بورډ نيوکې کوي او وايي چې رشيد خان د افغانستان د کرېکټ يو مهم سمبول دی او بايد له کپتانۍ نه وای لرې شوی.
تر اوسه د کرېکټ بورډ له لوري د دې پرېکړې د بدلون په اړه څه نه دي ويل شوي، خو تمه کېږي چې په راتلونکو ورځو کې به د دې موضوع په اړه بحثونه نور هم زيات شي.
Comments
Post a Comment